As Habitacións
Na planta baixa están a cociña, un aseo, o comedor, a sala de estar e unha habitación, o Cuarto de Palmira.
É un cuarto moi luminoso, con xanela no dormitorio e no baño. Está decorado en tons verdes e amarelos, con papel de parede na zona da cabeceira da cama e no espazo da sala. Ten unha cama de 1,50 m. A súa situación na planta baixa e con porta corredoira no baño fai que sexa accesible a persoas con mobilidade reducida.
A cociña está completamente equipada e dispón de vaixela, cristalería e cubertos, panos da louza e produtos de limpeza. Conta cunha mesa extensible con capacidade para 18 persoas e con pequenos electrodomésticos: espremedor e torradora eléctricos e cafeteira eléctrica de filtro (non de cápsulas) e italiana.
Este espazo foi o antigo comedor da casa e, antes diso, o lugar onde estaba o gando. Ten dous sofás de 2 prazas e un de 3 prazas cunha mesa de centro, e tamén unha mesa redonda con 5 cadeiras. Conserva o chan orixinal de baldosa hidráulica e o moble de comedor no que se gardaba a vaixela e a cristalería dos días de festa; este moble non se puido trasladar ao comedor actual porque foi feito a medida para o espazo no que está.
